Кожная сям’я — гэта цэлы сусвет, які складаецца з вялікіх планет — бацькоў і іх маленькіх спадарожнікаў — дзяцей.

Так і нараджэнне ў сям’і дзіця — значная падзея і вялікая радасць. 25 мая ў сям’і Сяргея і Марыны МІХАЙЛІЦКІХ на адну маленькую планетку стала больш — у сям’і нарадзіўся другі сынок — Дзімка. Напярэдадні яшчэ аднаго важнага свята — Дня абароны дзяцей шчаслівыя бацькі завіталі ў раённы ЗАГС на ўрачыстую рэгістрацыю малыша.

Начальнік райаддзела ЗАГСу Наталля ЛАЗОЎСКАЯ ўручыла Міхайліцкім пасведчанне аб нараджэнні і памятны сувенір, а маладой маме — кветкі.

— Яшчэ на адно сонейка прыбавілася ў нашай сям’і, — падзяліліся ўражаннямі Сяргей і Марына. — У нас расце старэйшы сынок — Дзяніс, яму ўжо 14. Хтосьці скажа: не хапае яшчэ лапачкі-дачушкі. Пабачым. Можа, і з дачушкай сюды завітаем!

— Самыя прыемныя працэдуры ў працы работнікаў ЗАГСу — рэгістрацыя новых сем’яў і новых жыхароў рэгіёна. Наша традыцыя — урачыстых віншаваннящ напярэдадні важных свят ці знакавых сямейных падзей вельмі падабаецца бялынічанам, — рэзюмавала Наталля Лазоўская.

Светлана Могилевчик